ဝန်ထမ်းရေးရာကိစ္စရပ်များ – Mobile

ပြည်ထောင်စုသမ္မတမြန်မာနိုင်ငံတော်

ပြည်ထောင်စုရာထူးဝန်အဖွဲ့

အမိန့်ကြော်ငြာစာအမှတ် ၈၁/ ၂၀၂၂

၁၃၈၄ ခုနှစ်၊ ဝါခေါင်လပြည့်ကျော် ၁၁ ရက်

( ၂၀၂၂ ခုနှစ်၊ ဩဂုတ်လ ၂၂ ရက်)

ပြည်ထောင်စုရာထူးဝန်အဖွဲ့သည် ပြည်ထောင်စုရာထူးဝန်အဖွဲ့ဥပဒေ၊ ပုဒ်မ ၉၊ ပုဒ်မခွဲ (င) နှင့်အညီ သက်ဆိုင်ရာဝန်ကြီးဌာနနှင့် အဖွဲ့အစည်းက ထူးခြားသောအခြေအနေ တစ်ရပ်ရပ်ကြောင့် ပြင်ပပုဂ္ဂိုလ်အား တိုက်ရိုက်ခန့်အပ်ရန်လိုအပ်၍ ပြည်ထောင်စုရာထူးဝန်အဖွဲ့သို့ အဆိုပြုရာတွင် လိုက်နာဆောင်ရွက်ရမည့်အချက်များကို ပြည်ထောင်စုရာထူးဝန်အဖွဲ့ဥပဒေ၊ ပုဒ်မ ၂၇၊ ပုဒ်မခွဲ (ခ)  အရ အပ်နှင်းထားသော လုပ်ပိုင်ခွင့်ကို ကျင့်သုံး၍ ဤအမိန့်ကြော်ငြာစာဖြင့် ထုတ်ပြန်သတ်မှတ်လိုက်သည်။

၁။               သက်ဆိုင်ရာဝန်ကြီးဌာနနှင့် အဖွဲ့အစည်းသည် ထူးခြားသောအခြေအနေတစ်ရပ်ရပ်ကြောင့် ပြင်ပပုဂ္ဂိုလ်အား တိုက်ရိုက်ခန့်အပ်ရန်လိုအပ်၍ ပြည်ထောင်စုရာထူးဝန်အဖွဲ့သို့ အဆိုပြုရာတွင် အောက်ဖော်ပြပါ သတ်မှတ်ချက်များနှင့် ကိုက်ညီသူများကို အဆိုပြုရမည်-

• (က)    ပြည်ထောင်စုသမ္မတမြန်မာနိုင်ငံသားဖြစ်ရမည်။
• (ခ)      ခန့်ထားလိုသော ရာထူးအဆင့်အတွက် သတ်မှတ်ထားသည့် ပညာအရည်အချင်း၊ ကျွမ်းကျင်မှုအရည်အချင်းများနှင့် ကိုက်ညီရမည်။
• (ဂ)       ပြစ်မှုကင်းရှင်းသူဖြစ်ရမည်။
• (ဃ)     ကျန်းမာကြောင်း ဆေးလက်မှတ်တင်ပြနိုင်ရမည်။
• (င)      ပါတီနိုင်ငံရေးကင်းရှင်းရမည်။ နိုင်ငံရေးပါတီတစ်ခုခုတွင် ပါဝင်နေသူဖြစ်ပါက နိုင်ငံ့ဝန်ထမ်းအဖြစ် ပြန်လည်ခန့်အပ်တာဝန်ပေးခြင်းခံရသည့်နေ့မှစ၍ ပါတီဝင်အဖြစ်မှ နုတ်ထွက်ရမည်။

၂။               သက်ဆိုင်ရာဝန်ကြီးဌာနနှင့် အဖွဲ့အစည်းသည် ပြင်ပပုဂ္ဂိုလ်ခန့်ထားရေးနှင့်စပ်လျဉ်း၍-

• (က)   အငြိမ်းစားဝန်ထမ်းဖြစ်ပါက လက်ရှိခံစားနေသည့် ပင်စင်လစာနှင့် လုပ်သက်ဆုငွေကို နိုင်ငံ့ဝန်ထမ်းနည်းဥပဒေများ၊ နည်းဥပဒေ ၂၃၇ မှ နည်းဥပဒေ ၂၄၀ အထိပါ ပြဋ္ဌာန်းချက်များနှင့်အညီ ဆက်လက်ဆောင်ရွက်ရမည်။
• (ခ)     မည်သည့်အခြေအနေကြောင့် ခန့်အပ်ရန် လိုအပ်သည်ကို ဖော်ပြရမည်။
  

၃။               ပြည်ထောင်စုရာထူးဝန်အဖွဲ့၏ ၂၈-၁၂-၂၀၁၈ ရက်စွဲပါ အမိန့်ကြော်ငြာစာအမှတ်၊ ၇၀/ ၂၀၁၈ အား ဤအမိန့်ကြော်ငြာစာဖြင့် လွှမ်းမိုးပယ်ဖျက်လိုက်သည်။

ဒေါက်တာမောင်မောင်နိုင်

ဥက္ကဋ္ဌ

ပြည်ထောင်စုရာထူးဝန်အဖွဲ့

ပြည်ထောင်စုသမ္မတမြန်မာနိုင်ငံတော်

ပြည်ထောင်စုရာထူးဝန်အဖွဲ့

အမိန့်ကြော်ငြာစာအမှတ်၊ ၉၃/၂၀၂၂

၁၃၈၄ ခုနှစ်၊ တော်သလင်းဆန်း ၄ ရက်

( ၂၀၂၂ ခုနှစ်၊ ဩဂုတ်လ ၂၉ ရက်)

ပြည်ထောင်စုရာထူးဝန်အဖွဲ့သည် နိုင်ငံ့ဝန်ထမ်းဥပဒေ ပုဒ်မ ၇၆၊ ပုဒ်မခွဲ (ခ) အရ အပ်နှင်းထားသော လုပ်ပိုင်ခွင့်ကို ကျင့်သုံး၍ နိုင်ငံ့ဝန်ထမ်းများအား ရာထူးတိုးမြှင့်ခန့်ထားရာတွင် တစ်ပြေးညီဖြစ်စေရေးအတွက် လုပ်သက်ရမှတ်တွက်ချက်နည်းကို ဤအမိန့်ကြော်ငြာစာဖြင့် ထုတ်ပြန် သတ်မှတ်လိုက်သည်။

ဝန်ကြီးဌာနနှင့် အဖွဲ့အစည်းများအနေဖြင့် နိုင်ငံ့ဝန်ထမ်းများ၏ ရာထူးတိုးမြှင့်ခန့်ထားခြင်းအတွက် အရည်အချင်းစစ်ဆေးအကဲဖြတ်ရာတွင် နိုင်ငံ့ဝန်ထမ်းနည်းဥပဒေများ၊ နည်းဥပဒေ ၃၅၊ နည်းဥပဒေခွဲ (ဂ) ပါအတိုင်း အမှတ်ပေးစနစ်အပေါ်အခြေခံ၍ ဝန်ထမ်းတစ်ဦး၏ လုပ်သက်ရမှတ်များ အချိုးကျ အပြည့်အဝရရှိစေရန် နည်းဥပဒေ ၃၆၊ နည်းဥပဒေခွဲ (ခ) ပါ မူလသတ်မှတ်ချက်များအရ တွက်ချက်ရရှိသည့် အဆင့်လိုက်လုပ်သက်ရမှတ်ပေါင်းကို ဝန်ထမ်းလုပ်သက်ရမှတ် တစ်ပြေးညီဖြစ်စေရေးအတွက် အသက် ၁၈ နှစ်မှ သက်ပြည့်အငြိမ်းစားယူရမည့် အသက် ၆၂ နှစ်အထိ လုပ်သက်ပြည့် ၄၄ နှစ် တာဝန်ထမ်းဆောင်ပါက ရရှိမည့် လုပ်သက်ရမှတ်ဖြင့် ၁၀၀% အပေါ် အခြေခံသည့် အောက်ဖော်ပါနည်းလမ်းဖြင့် တွက်ချက်ရမည်-

ရှင်းလင်းချက်။          လုပ်သက်ပြည့် ၄၄ နှစ် တာဝန်ထမ်းဆောင်ပါက ရရှိမည့်ရမှတ်ကို လက်ရှိ အဆင့်အလိုက် လုပ်သက်ရမှတ်ပေါင်း + {(၄၄ – ဝန်ထမ်းလုပ်သက်) x ၃ မှတ်} ပုံသေနည်းဖြင့် တွက်ချက်သတ်မှတ်ရမည်။

      ဒေါက်တာမောင်မောင်နိုင်

                  ဥက္ကဋ္ဌ

ပြည်ထောင်စုရာထူးဝန်အဖွဲ့