(၄) ဝန်ထမ်းများလေ့ကျင့်ခြင်း

အခန်း(၄)
ဝန်ထမ်းများလေ့ကျင့်ခြင်း

၂၉။ အဖွဲ့သည် ဝန်ထမ်းများလေ့ကျင့်ပျိုးထောင်ရေး ဆောင်ရွက်ရာတွင် အောက်ပါ အရည်အချင်းများမြင့်မားလာစေရန် ဆောင်ရွက်ရမည် –

• (က) ဝန်ထမ်းများ သိရှိရမည့်ဥပဒေ၊ နည်းဥပဒေများ၊ စည်းမျဉ်း စည်းကမ်း၊ လုပ်ထုံးလုပ်နည်းများကို သိရှိနားလည်မှု၊
• ( ခ ) ရုံးလုပ်ငန်းဆိုင်ရာ စီမံခန့်ခွဲအုပ်ချုပ်မှုပညာကို ကျွမ်းကျင် တတ်မြောက်မှု၊
• ( ဂ ) အဖွဲ့အစည်းဆိုင်ရာ စီမံခန့်ခွဲအုပ်ချုပ်မှုပညာကို ကျွမ်းကျင် တတ်မြောက်မှု၊
• (ဃ) ပြည်သူ့ရေးရာစီမံခန့်ခွဲအုပ်ချုပ်မှုပညာကို ကျွမ်းကျင်တတ်မြောက်မှု၊
• ( င ) ကောင်းမွန်သောအုပ်ချုပ်ရေးနှင့် ခေါင်းဆောင်မှုသဘောတရားများနားလည်တတ်မြောက်မှု၊
• ( စ ) ပြည်တွင်း၊ ပြည်ပ နိုင်ငံရေး၊ စီးပွားရေးနှင့် လူမှုရေးအခြေအနေများကို လေ့လာဆည်းပူးသိရှိနားလည်မှု၊
• (ဆ) နိုင်ငံတော်က ထုတ်ပြန်သတ်မှတ်ထားသည့် မူဝါဒ၊ ရည်မှန်းချက်၊လုပ်ငန်းစဉ်၊ ဥပဒေ၊ အမိန့်နှင့်ညွှန်ကြားချက်များကို သိရှိနားလည်မှု၊
• ( ဇ ) နိုင်ငံ့ဝန်ထမ်းတစ်ဦး တတ်မြောက်သင့်သော အခြေခံသတင်းအချက်အလက်နှင့် နည်းပညာလေ့ကျင့်တတ်ကျွမ်းမှု။

၃၀။ အဖွဲ့သည် အောက်ပါသင်တန်းများကို ဖွင့်လှစ်ရမည် –

• (က) အထူးမွမ်းမံသင်တန်းများ
  • (၁) ပြည်ထောင်စုအစိုးရအဖွဲ့ရုံးက အခါအားလျော်စွာ ညွှန်ကြားသော သင်တန်းများ၊
  • (၂) ဝန်ကြီးဌာနနှင့်အဖွဲ့အစည်းများက အခါအားလျော်စွာ အဆိုပြုလာသော သင်တန်းများ။
• (ခ)     ပုံမှန်သင်တန်းများ
  •          (၁)   ဝန်ထမ်းအဖွဲ့အစည်းအကြီးအမှူးသင်တန်း၊
  •          (၂)   အဆင့်မြင့်အရာထမ်းသင်တန်း၊
  •          (၃)   အလယ်အလတ်အဆင့်အရာထမ်းသင်တန်း၊
  •          (၄)   အရာထမ်းအခြေခံသင်တန်း၊
  •          (၅)   အရာထမ်းလောင်း (အထူး) သင်တန်း၊
  •          (၆)    အရာထမ်းငယ်သင်တန်း၊
  •          (၇)   စာရေးဝန်ထမ်းကြီးကြပ်သင်တန်း၊
  •          (၈)   စာရေးဝန်ထမ်းသင်တန်း။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၁။ အဖွဲ့သည် နည်းဥပဒေ ၃၀ ပါ သင်တန်းများတွင် အောက်ပါဘာသာရပ်များကို လိုအပ်သလို ပို့ချပေးရမည် –

• (က) စီမံခန့်ခွဲမှုပညာဘာသာရပ်၊
• ( ခ ) စီးပွားရေးပညာဘာသာရပ်၊
• ( ဂ ) ဥပဒေပညာဘာသာရပ်၊
• (ဃ) လူမှုရေးသိပ္ပံပညာဘာသာရပ်၊
• ( င ) နိုင်ငံရေးသိပ္ပံပညာဘာသာရပ်၊
• ( စ ) အင်္ဂလိပ်စာဘာသာရပ်၊
• (ဆ) သတင်းအချက်အလက်နှင့် ဆက်သွယ်ရေးနည်းပညာဘာသာရပ်။
• (ဇ)    ကာကွယ်ရေးပညာဘာသာရပ်။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၂။     ဝန်ထမ်းအဖွဲ့အစည်းအကြီးအမှူးသင်တန်းသို့ သက်ဆိုင်ရာ ဝန်ကြီးဌာနနှင့်အဖွဲ့အစည်း များက ရွေးချယ်စေလွှတ်သော ကျန်းမာရေးကောင်းမွန်သည့် အသက် (၅၇) နှစ်နှင့် အောက် ဒုတိယညွှန်ကြားရေးမှူးချုပ်နှင့်အဆင့်တူ အရာထမ်းများ တက်ရောက်ရမည်။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၃။ အဆင့်မြင့်အရာထမ်းသင်တန်းသို့ သက်ဆိုင်ရာ ဝန်ကြီးဌာနနှင့်အဖွဲ့အစည်းများက ရွေးချယ်စေလွှတ်သော ကျန်းမာရေးကောင်းမွန်သည့် အသက် (၅၅) နှစ်နှင့်အောက် ညွှန်ကြားရေးမှူးနှင့်အဆင့်တူ အရာထမ်းများ တက်ရောက်ရမည်။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၄။    အလယ်အလတ်အဆင့်အရာထမ်းသင်တန်းသို့ သက်ဆိုင်ရာဝန်ကြီးဌာနနှင့်အဖွဲ့အစည်း များက ရွေးချယ်စေလွှတ်သော ကျန်းမာရေးကောင်းမွန်သည့် အသက်(၅၂)နှစ်နှင့်အောက် လက်ထောက်ညွှန်ကြားရေးမှူး၊ ဒုတိယညွှန်ကြားရေးမှူးနှင့်အဆင့်တူအရာထမ်းများ တက်ရောက်ရမည်။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၅။    အရာထမ်းအခြေခံသင်တန်းသို့ သက်ဆိုင်ရာ ဝန်ကြီးဌာနနှင့် အဖွဲ့အစည်းများက ရွေးချယ် စေလွှတ်သော ကျန်းမာရေးကောင်းမွန်သည့် အသက် (၄၅)နှစ်နှင့်အောက် ဦးစီးအရာရှိနှင့် အဆင့်တူအရာထမ်းများ တက်ရောက်ရမည်။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၆။   အရာထမ်းလောင်း (အထူး) သင်တန်းသို့ ဝန်ကြီးဌာနနှင့် အဖွဲ့အစည်းများအတွက် အဖွဲ့က ရွေးချယ်ခြင်းခံရသည့် ကျန်းမာရေးကောင်းမွန်သည့် ပြန်တမ်းဝင် အရာရှိလောင်းများ တက်ရောက်ရမည်။*၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

၃၇။    အရာထမ်းငယ်သင်တန်းသို့ သက်ဆိုင်ရာ ဝန်ကြီးဌာနနှင့် အဖွဲ့အစည်းများက ရွေးချယ် စေလွှတ်သော ကျန်းမာရေးကောင်းမွန်သည့် အသက် (၄၅) နှစ်နှင့် အောက်ရှိ အောက်ဖော်ပြပါ ဝန်ထမ်းများတက်ရောက်ရမည်- *၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။

• (က) စီမံခန့်ခွဲရေးဝန်ထမ်း (စီးပွားရေး) အဆင့် (၂)၊
• ( ခ ) ပညာရှင်အဆင့် (၃)၊
• ( ဂ ) ကျွမ်းကျင်ဝန်ထမ်းအဆင့် (၅)၊
• (ဃ) စီမံခန့်ခွဲရေးဝန်ထမ်း (အုပ်ချုပ်ရေး၊ လူမှုရေး) အဆင့် (၁)။

၃၈။    စာရေးဝန်ထမ်းကြီးကြပ်သင်တန်းသို့ သက်ဆိုင်ရာ ဝန်ကြီးဌာနနှင့် အဖွဲ့အစည်းများက ရွေးချယ်စေလွှတ်သော ကျန်းမာရေးကောင်းမွန်သည့် အသက် (၄၅)နှစ်နှင့်အောက် ဌာနခွဲစာရေးနှင့် ရုံးအုပ်များ တက်ရောက်ရမည်။ *၃၀-၁-၂၀၂၃ ရက်နေ့တွင် ပထမအကြိမ်ပြင်ဆင်သည်။