အမိန့်ကြော်ငြာစာ အမှတ် ၁၁၈/၂၀၂၀

အခန်း(၁)
နိဒါန်း

၁။ နိုင်ငံ့ဝန်ထမ်းနည်းဥပဒေများ ၊ နည်းဥပဒေ ၁၄၊ နည်းဥပဒေခွဲ (ဂ) နှင့် ပြည်ထောင်စု ရာထူးဝန်အဖွဲ့နည်းဥပဒေများ ၊ နည်းဥပဒေ ၂၂ တို့အရ ပြည်ထောင်စုအဆင့်အဖွဲ့အစည်းများနှင့် ဝန်ကြီးဌာနများ၏ ဝန်ထမ်းအဖွဲ့အစည်းအသီးသီးရှိ ဝန်ထမ်းအမျိုးအစားအလိုက်သတ်မှတ်သည့် ပြန်တမ်းဝင်အရာရှိအဆင့် ရာထူးနှင့်စပ်လျဉ်း၍ ဌာနတွင်းမှဝန်ထမ်းများအား ရာထူးတိုးမြှင့် ခန့်အပ်နိုင်ရန် ပြည်ထောင်စုရာထူးဝန်အဖွဲ့သို့ အဆိုပြုညှိနှိုင်း၍ သဘောတူညီချက်ရယူပြီး ရာထူး တိုးမြှင့်ပေးခြင်းတို့ကို ဆောင်ရွက်လျက်ရှိပါသည်။

၂။ ယင်းသို့ ပြန်တမ်းဝင်အရာရှိအဖြစ် စတင်ခန့်ထားမည့် ဦးစီးအရာရှိနှင့်အဆင့်တူရာထူး များသည် အမှုထမ်းအဆင့်မှ အရာထမ်းအဆင့်သို့ ကူးပြောင်းမည့် ရာထူးဖြစ်သဖြင့်လည်းကောင်း၊ ပြန်တမ်းဝင်အရာရှိအဖြစ် စတင်ခန့်ထားမည့် ရာထူးဖြစ်သဖြင့်လည်းကောင်း ၎င်းရာထူးများတွင် တာဝန်ထမ်းဆောင်မည့် ဝန်ထမ်းများ၏ စွမ်းဆောင်ရည်ကို မှန်ကန်စွာ အကဲဖြတ်သုံးသပ်နိုင်ရန် အရေးကြီးပါသည်။

၃။  သို့အတွက် ပြန်တမ်းဝင်အရာရှိအဆင့် (ဦးစီးအရာရှိနှင့်အဆင့်တူရာထူး)၏ တစ်ဆင့်နိမ့် ဝန်ထမ်းများအား ၎င်းတို့တာဝန်ထမ်းဆောင်ခဲ့သော ပြက္ခဒိန်နှစ်အတွင်း မည်သည့်လုပ်ငန်းတာဝန် များကိုဆောင်ရွက်ခဲ့သည်၊ မည်မျှစွမ်းဆောင်အောင်မြင်ခဲ့သည်၊ မည်မျှတိုးတက်မှုရရှိခဲ့သည် စသည့် တာဝန်ထမ်းဆောင်မှုဆိုင်ရာ စွမ်းဆောင်ရည်အကဲဖြတ်သုံးသပ်မှုများကို ကနဦးအကဲဖြတ်သူက သုံးသပ်ရန်အတွက် ရလဒ်ကိုအခြေခံသည့်စွမ်းဆောင်ရည်အကဲဖြတ်သည့် စနစ်ကိုရေးဆွဲရခြင်း ဖြစ်ပါသည်။

အခန်း(၂)
ရည်ရွယ်ချက်များ

၄။ ဤစွမ်းဆောင်ရည်အကဲဖြတ်သုံးသပ်သည့် စနစ်ကိုရေးဆွဲရသည့် ရည်ရွယ်ချက်များမှာ အောက်ဖော်ပြပါအတိုင်းဖြစ်ပါသည်-

• (က) ပြန်တမ်းဝင်အရာရှိအဆင့် (ဦးစီးအရာရှိနှင့်အဆင့်တူရာထူး) သို့ တိုးမြှင့်ခန့်ထားမည့် ဝန်ထမ်းများ၏ စွမ်းဆောင်ရည်အကဲဖြတ်သုံးသပ်ရာ၌ ရလဒ်ကိုအခြေခံသည့် စနစ်ကို ပြောင်းလဲကျင့်သုံးနိုင်စေရန်၊
• ( ခ ) အဆိုပါအဆင့်သို့ တိုးမြှင့်ခန့်ထားမည့် ရာထူးနေရာများနှင့်အမှန်တကယ် ကိုက်ညီမှုရှိ သည့် ဝန်ထမ်းများကို ရွေးချယ်ခန့်ထားနိုင်စေရန်၊
• ( ဂ ) စွမ်းဆောင်ရည်ပြည့်ဝပြီး ပိုမိုခိုင်မာအားကောင်းသည့် ဝန်ထမ်းအဖွဲ့အစည်းတစ်ရပ် ပေါ်ထွန်းလာစေရန်။

အခန်း(၃)
ဆောင်ရွက်မည့်လုပ်ငန်းစဉ်များ

အကဲဖြတ်သုံးသပ်ခြင်း

၅။ ပြန်တမ်းဝင်အရာရှိအဆင့် (ဦးစီးအရာရှိနှင့်အဆင့်တူရာထူး) ၏ တစ်ဆင့်နိမ့် ဝန်ထမ်း များအား အကဲဖြတ်သုံးသပ်ခြင်းပြုလုပ်နိုင်ရန် လူတွေ့စစ်ဆေးခြင်းကို ဆောင်ရွက်ရမည်။

အကဲဖြတ်သုံးသပ်ရမည့်အချိန်

၆။ လွန်ခဲ့သော ပြက္ခဒိန်နှစ်အတွက် အကဲဖြတ်သုံးသပ်မှုကို ဇန်နဝါရီလတွင် ဆောင်ရွက် ရမည့်အပြင် နောင်လာမည့်တစ်နှစ်တာအတွက် ဆောင်ရွက်ရမည့် လုပ်ငန်းတာဝန်များကိုလည်း ဇန်နဝါရီလ၌ပင် သတ်မှတ်ဆောင်ရွက်ရပါမည်။

အကဲဖြတ်သုံးသပ်မှုပြုလုပ်ရန်ကြိုတင်ပြင်ဆင်ခြင်း

၇။ ကနဦးအကဲဖြတ်သူအရာရှိအနေဖြင့် စွမ်းဆောင်ရည်အကဲဖြတ်သုံးသပ်မှုအတွက် အောက်ပါ လုပ်ငန်းစဉ်များကို ကြိုတင်ပြင်ဆင်လျာထားရမည်-

• (က) အကဲဖြတ်မည့်နေ့ရက်နှင့် အချိန်ကိုသတ်မှတ်ပြီး ရက်သတ္တ သုံးပတ်ခန့်ကြိုတင်၍ အကဲဖြတ်ခံဝန်ထမ်းကို အသိပေးခြင်း၊
• ( ခ ) နိုင်ငံ့ဝန်ထမ်းနည်းဥပဒေများ၊ နည်းဥပဒေ ၃၅ (ဆ) နှင့် ပြည်ထောင်စုရာထူးဝန် အဖွဲ့၏ အမိန့်ကြော်ငြာစာအမှတ်၊ ၄/၂၀၂၀ ပါ သတ်မှတ်ချက်များနှင့်အညီ အကဲဖြတ်ခြင်း၊
• ( ဂ ) ဝန်ထမ်း၏ တိုးတက်မှုများနှင့်စပ်လျဉ်း၍ မိမိအမြင်နှင့် အကြံပြုချက်များကို စွမ်းဆောင်ရည်အကဲဖြတ်သည့်ပုံစံတွင် ရေးသားခြင်း၊
• (ဃ) ဆောင်ရွက်ရမည့် လုပ်ငန်းတာဝန်တစ်ခုချင်းစီအတွက် ဆောင်ရွက်ခဲ့သည့် စွမ်းဆောင်ရည်များကို ဝန်ထမ်းကိုယ်တိုင် အကဲဖြတ်သုံးသပ်၍ မှတ်တမ်းပြုလုပ် ထားရန် ဝန်ထမ်းများကို မှာကြားခြင်း၊
• (င) ပြက္ခဒိန်နှစ်အတွင်း ပြောင်းရွှေ့တာဝန်ထမ်းဆောင်ရပါက မိမိအကဲဖြတ်ရသည့် အကဲဖြတ်ခံဝန်ထမ်းများ၏ ဆောင်ရွက်ချက်များကို ရေးမှတ်ထားသည့် မှတ်တမ်းအား ၎င်း၏ရာထူးနေရာသို့ လွှဲပြောင်းတာဝန်ထမ်းဆောင်မည့်အရာရှိ သို့မဟုတ် အထက် အဆင့်အရာရှိထံသို့ စနစ်တကျလွှဲပြောင်းပေးခြင်း၊
• (စ) ပြက္ခဒိန်နှစ်အတွင်း အကဲဖြတ်ခံဝန်ထမ်း ပြောင်းရွှေ့ရပါက သက်ဆိုင်ရာဌာနအနေဖြင့် ဝန်ထမ်းမှတ်တမ်းစာအုပ်နှင့်အတူ ဝန်ထမ်းအပေါ် အကဲဖြတ်ထားသည့် မှတ်တမ်းကို ပြောင်းရွှေ့မည့်ဌာနသို့ တစ်ပါတည်း ပူးတွဲပေးပို့ခြင်း။

လုပ်ငန်းစွမ်းဆောင်ရည် အကဲဖြတ်သုံးသပ်ခြင်း

၉။ လုပ်ငန်းစွမ်းဆောင်ရည် အကဲဖြတ်သုံးသပ်ခြင်းကို လူတွေ့စစ်ဆေးမည့် နည်းလမ်းဖြင့် ဆောင်ရွက်ပါက အကဲဖြတ်သူအရာရှိသည် အကဲဖြတ်ခံဝန်ထမ်း၏ လုပ်ငန်းစွမ်းဆောင်ရည်အပေါ် သက်ရောက်မှုရှိသည့် အကြောင်းတရားများကို သိရှိနိုင်မည်ဖြစ်သောကြောင့် ပိုမိုထိရောက်မှုရှိမည် ဖြစ်ပါသည်။