အမိန့်ကြော်ငြာစာ အမှတ် ၁၁၈/၂၀၂၀

လုပ်ငန်းစွမ်းဆောင်ရည် အကဲဖြတ်သုံးသပ်မှုတွင် အသုံးပြုသင့်သည့် မေးခွန်းများ

၁၀။ ဝန်ထမ်းမှပွင့်လင်းစွာပြောဆိုလာစေရန် အကဲဖြတ်သူအရာရှိအနေဖြင့် ပြင်ဆင်ထား သင့်သည့် မေးခွန်းအချို့ကို နမူနာအဖြစ် အောက်ပါအတိုင်းဖော်ပြထားပါသည် –

• (က) တစ်နှစ်တာအတွင်း ဆောင်ရွက်ခဲ့သည့် လုပ်ငန်းတာဝန်တွေကဘာတွေလဲ။
• ( ခ ) ဘယ်လုပ်ငန်းတာဝန်တွေကိုအဆင်ပြေပြေစွမ်းဆောင်နိုင်ခဲ့သလဲ။
• ( ဂ ) ဘယ်လုပ်ငန်းတာဝန်ကအခက်အခဲရှိသလဲ။
• (ဃ) ဘယ်လုပ်ငန်းတာဝန်ကစိန်ခေါ်မှုအကြီးမားဆုံးလဲ။
• ( င ) မအောင်မြင်ခဲ့သည့် လုပ်ငန်းတာဝန်ရှိပါသလား/ ဘယ်နှစ်ခုလဲ။
• ( စ ) မိမိဂုဏ်အယူရဆုံးကဘာလဲ။
• (ဆ) တစ်နှစ်တာအတွင်းအခက်အခဲရှိခဲ့တဲ့ လုပ်ငန်းတာဝန်တွေအပေါ် ရလဒ်ကောင်းတွေ ရရှိအောင် ဘယ်လိုလုပ်သင့်သလဲ။
• ( ဇ ) တစ်နှစ်တာအတွင်း သတ်မှတ်ထားသည့်လုပ်ငန်းတာဝန်ကို ပြီးဆုံးအောင် မဆောင်ရွက် နိုင်ခဲ့သည့် အကြောင်းအရင်းမှာ ဘာတွေလဲ။
• (ဈ) အဲဒီလိုအဆင်မပြေခြင်းကို ပြောင်းလဲသွားအောင် ဘယ်လိုလုပ်နိုင်မယ်လို့ ထင်သလဲ/ ဘယ်လိုအကူအညီမျိုးထောက်ပံ့ပေးရန် လိုအပ်သလဲ။

အကဲဖြတ်သုံးသပ်မှုတွင် တုံ့ပြန်အကြံပြုခြင်းအခန်းကဏ္ဍ

၁၁။ လုပ်ငန်းစွမ်းဆောင်ရည် အကဲဖြတ်သုံးသပ်မှု၏ အဓိကရည်ရွယ်ချက်မှာ အကဲဖြတ်ခံ ဝန်ထမ်းသည် ၎င်း၏ အကဲဖြတ်သူအရာရှိထံမှ တုံ့ပြန်အကြံပြုမှုများကို လက်ခံရရှိနိုင်ရန်နှင့် ၎င်း၏ လုပ်ငန်းစွမ်းဆောင်ရည်အပေါ် အကဲဖြတ်သူ၏ ထင်မြင်ယူဆချက်၊ သဘောထားကိုသိရှိနိုင်ရန် ဖြစ်ပါသည်။ အကဲဖြတ်သုံးသပ်မှုတွင် ဝေဖန်ထောက်ပြမှုနှင့် ချီးကျူးပြောဆိုမှုများကို မျှမျှတတ ဆောင်ရွက်ရန်ဖြစ်၍ အကဲဖြတ်သူအရာရှိအနေဖြင့် ဝန်ထမ်းများ၏အားသာချက်၊ အားနည်းချက် များကို မှန်ကန်စွာထုတ်ဖော်ပြီး လုပ်ငန်းလုပ်ဆောင်ရာတွင် အားသာချက်များကို အလေးပေး ဆောင်ရွက်စေပြီး အားနည်းချက်များကိုလည်း ဝေဖန်ထောက်ပြ၍ အားသာချက် ဖြစ်လာစေရန် လေ့ကျင့်ပျိုးထောင် တိုက်တွန်းပေးခြင်းကို ဆောင်ရွက်နိုင်ရန်ဖြစ်ပါသည်။ ဝန်ထမ်းအား ဝေဖန် ထောက်ပြခြင်း သို့မဟုတ် တည့်မတ်အကြံပြုခြင်းတို့ကို အောက်ပါနည်းလမ်းအတိုင်း ဆောင်ရွက် နိုင်ပါသည်-

အကဲဖြတ်သုံးသပ်ခြင်းအနှစ်ချုပ်

၁၂။ အကဲဖြတ်သူအရာရှိသည် တွေ့ဆုံမှုပြီးဆုံးချိန်တွင် အကဲဖြတ်ခံဝန်ထမ်းအတွက် ၎င်းတို့၏ တုံ့ပြန်အကြံပြုချက်များကို အောက်ဖော်ပြပါအတိုင်း ပြန်လည်အနှစ်ချုပ်ပေးသင့်ပါသည် –

• (က) ထိရောက်အောင်မြင်မှုရှိ၍ ဆက်လုပ်စေချင်သည့် (keep doing) အရာများမှာ အဘယ်နည်း။
• ( ခ ) အထောက်အကူမဖြစ်၍ ဆက်မလုပ်စေချင်သည့် (stop doing) အရာများမှာ အဘယ်နည်း။
• ( ဂ ) ပိုမိုထိရောက်မှုရှိစေမည်ဖြစ်၍ စလုပ်စေချင်သည့် (start doing) အရာများမှာ အဘယ်နည်း။

မှတ်တမ်းတင်ရမည့်အချက်များ

၁၃။ အကဲဖြတ်ခံဝန်ထမ်း၏ တိုးတက်မှုအခြေအနေ သို့မဟုတ် စွမ်းဆောင်ရည်ပြည့်မီခြင်း ရှိ/မရှိ နှင့်စပ်လျဉ်းသည့် အကဲဖြတ်သူအရာရှိ၏ မှတ်ချက်ကို လုပ်ငန်းစွမ်းဆောင်မှု အစီအစဉ်ပုံစံတွင် ဖော်ပြထားပါသည်။ အကဲဖြတ်သူအရာရှိသည် စွမ်းဆောင်ရည်အကဲဖြတ်သုံးသပ်မှုတွင် အကဲဖြတ်ခံ ဝန်ထမ်းဘက်မှ ရှင်းလင်းဆွေးနွေးရန် ရှိသည်များကို နားထောင်ရခြင်း မရှိသေးမီ ၎င်းတို့၏ မှတ်ချက် များကို ကြိုတင်ရေးသားခြင်း သို့မဟုတ် စွမ်းဆောင်ရည်အဆင့်ကို အပြီးသတ် သတ်မှတ်ခြင်းများ မပြုလုပ်သင့်ပါ။

စွမ်းဆောင်ရည်အဆင့်သတ်မှတ်ချက်များနှင့် ထည့်သွင်းစဉ်းစားရမည့်အချက်များ

၁၄။ ဝန်ထမ်း၏ လုပ်ငန်းတာဝန်များစွမ်းဆောင်မှုအပေါ် အဆင့်သတ်မှတ်ရာတွင် နိုင်ငံ့ဝန်ထမ်း နည်းဥပဒေများ၊ နည်းဥပဒေ ၃၅၊ နည်းဥပဒေခွဲ (ဇ) ပါ ပြဋ္ဌာန်းချက်နှင့်အညီ သာမန်အောက်၊ သာမန်၊ သာမန်အထက်၊ထူးချွန်အဆင့်ဟူ၍ အဆင့်(၄)ဆင့်သတ်မှတ်ရမည်။ အကဲဖြတ်သူအရာရှိသည် တစ်နှစ်တာအတွင်း လုပ်ငန်းစွမ်းဆောင်မှုများအားလုံးကိုခြုံငုံ၍ အဆင့်သတ်မှတ်ချက်တစ်ခုကိုသာ ပေးရပါမည်။ အကဲဖြတ်ခံဝန်ထမ်းအား လုပ်ငန်းတာဝန်များ ဆောင်ရွက်ခဲ့မှုအပေါ် တိုးတက်မှုရှိ-မရှိကို အသိပေး၍ တိုးတက်အောင်ဆောင်ရွက်နိုင်မည့် အစီအစဉ်ကို ရေးဆွဲရမည်။

၁၅။ လုပ်ငန်းစွမ်းဆောင်ရည်ကို ‘အဆင့်သတ်မှတ်’ရာတွင် အဆင့်သတ်မှတ်သူ၏ ထင်မြင်ယူဆချက်များ အတိုင်းအတာတစ်ခုအထိ ပါဝင်မည်ဖြစ်သည်။ အချို့လုပ်ငန်းတာဝန်များမှာ ပြည့်မီပြီး အချို့မှာမူ ဝန်ထမ်းအနေဖြင့် စီမံထိန်းချုပ်ရန်မစွမ်းသာသည့် ခိုင်လုံသောအကြောင်းတရားများကြောင့် ပြည့်မီမှုမရှိခြင်းများလည်း ရှိနိုင်သည်။ အချို့လုပ်ငန်းတာဝန်များသည် အရေးပါပြီးအလုပ်၏ ၈၀% သည် ထိုလုပ်ငန်းတာဝန် ပြီးမြောက်အောင်မြင်ရေးအတွက် လုပ်ဆောင်ရခြင်းဖြစ်နိုင်ပြီး အချို့လုပ်ငန်းတာဝန် များမှာမူ ထိုမျှလောက် အရေးမပါခြင်းများလည်း ရှိနိုင်သည်။ အချို့လုပ်ငန်းတာဝန်များသည် ပြည့်မီအောင် လုပ်ဆောင်ရန် ‘လွယ်ကူကြောင်း’ တွေ့ရပြီး အချို့မှာမူ များစွာပိုမိုခက်ခဲသည်ကို တွေ့ရနိုင်သည်။

၁၆။ တစ်နှစ်တာကာလအတွက် စွမ်းဆောင်ရည်အဆင့်ကိုသတ်မှတ်ရာတွင် အောက်ပါအချက် များကို ထည့်သွင်းစဉ်းစားရမည် –

• (က) တစ်နှစ်တာအတွင်းအဓိကဆောင်ရွက်ခဲ့သည့် လုပ်ငန်းများ၊
• ( ခ ) ရံဖန်ရံခါ လုပ်ဆောင်မှုများထက် တစ်နှစ်ပတ်လုံး တစ်သမတ်တည်း စွမ်းဆောင် နိုင်မှုများ၊
  ( ဂ ) အကဲဖြတ်ခံဝန်ထမ်း၏ ဆောင်ရွက်မှုများကိုသာမက ဆောင်ရွက်ခဲ့သည့်နည်းလမ်း များနှင့် ဖြစ်ပေါ်ခဲ့သည့် အကျိုးသက်ရောက်မှုများ။

စွမ်းဆောင်ရည်အကဲဖြတ်သုံးသပ်ပြီးနောက် ဆောင်ရွက်ရမည့် လုပ်ငန်းစဉ်များ

၁၇။ ဝန်ထမ်းအား ရာထူးတိုးမြှင့်ခန့်အပ်ရန် အကြောင်းပေါ်ပေါက်လာပါက နိုင်ငံ့ဝန်ထမ်း နည်းဥပဒေများ၊ နည်းဥပဒေ ၃၅(ဈ)(၄)အရ သီးခြားအကဲဖြတ်မှတ်တမ်းရေးရာ၌ တစ်နှစ်တာကာလ အတွက် စွမ်းဆောင်ရည်အကဲဖြတ်သည့်ပုံစံတွင် အကဲဖြတ်ချက်အမှတ်ပေးထားမှုများကို ထည့်သွင်း သုံးသပ်ရမည်။

၁၈။ အကဲဖြတ်ခံဝန်ထမ်းသည် သာမန်အောက်အဆင့်သတ်မှတ်ခံရလျှင် ဝန်ထမ်း၏စွမ်းဆောင်ရည် အားနည်းမှုများကို ပိုမိုတိုးတက်ကောင်းမွန်လာစေရန် စွမ်းဆောင်ရည်တိုးတက်ရေး အစီအစဉ် တစ်ခုကို ရေးဆွဲရန် လိုအပ်ပါသည်။

၁၉။ လုပ်ငန်းစွမ်းဆောင်ရည် အကဲဖြတ်သုံးသပ်မှုပြီးစီးလျှင် အကဲဖြတ်သူအရာရှိသည် အကဲဖြတ်ခံဝန်ထမ်း ရှင်းလင်းပြောကြားသွားသည်များကို ထည့်သွင်းစဉ်းစားကာ လုပ်ငန်း စွမ်းဆောင်မှုအစီအစဉ် ပုံစံထဲတွင် ဖြည့်စွက်ရပါမည်။ ‘ကနဦးအကဲဖြတ်သူအရာရှိ၏ တစ်နှစ်တာ အကဲဖြတ်သုံးသပ်မှုမှတ်ချက်’ စာတိုင်တွင် လုပ်ငန်းတာဝန်တစ်ခုချင်းစီအား အကောင်အထည်ဖော် ဆောင်ရွက်နိုင်ခဲ့မှုအခြေအနေများကိုရေးသားပြီး စွမ်းဆောင်ရည်အဆင့်သတ်မှတ်ချက်ကို သတ်မှတ် ပေးရမည်။ ပုံစံ၏ နောက်ဘက်စာမျက်နှာရှိ နောက်ဆုံးအဆင့်သတ်မှတ်ချက်ပါ သင့်လျော်သည့် အကွက်ထဲတွင် အမှတ်ခြစ်ပေးပါ။ ထို့နောက် တစ်နှစ်တာအတွင်း အကဲဖြတ်ခံဝန်ထမ်း၏ အဓိက စွမ်းဆောင်မှုများနှင့် အဖွဲ့အစည်းအတွက် အထောက်အကူပြုမှုများကို အနှစ်ချုပ်ရေးသားရမည်။