ပြည်ထောင်စုရာထူးဝန်အဖွဲ့နည်းဥပဒေများ – Mobile

၃၀။ အဖွဲ့သည် အောက်ပါသင်တန်းများကို ဖွင့်လှစ်ရမည်-

• (က) အထူးမွမ်းမံသင်တန်းများ
  • (၁) တက္ကသိုလ်ကောလိပ် ဆရာ၊ ဆရာမများ အထူးမွမ်းမံသင်တန်း၊
  • (၂) အခြေခံပညာဆရာ၊ ဆရာမများ အထူးမွမ်းမံသင်တန်း၊
  • (၃) ဝန်ထမ်းအဖွဲ့အစည်းများက အခါအားလျော်စွာ အဆိုပြုလာသော အရာရှိများ အထူးမွမ်းမံသင်တန်း။
• ( ခ ) ပုံမှန်သင်တန်းများ
  • (၁) အလယ်အလတ်အဆင့် အရာထမ်းစီမံခန့်ခွဲမှုသင်တန်း၊
  • (၂) အရာထမ်းအခြေခံသင်တန်း၊
  • (၃) အရာထမ်းလောင်းအခြေခံသင်တန်း၊
  • (၄) အရာထမ်းငယ်အခြေခံသင်တန်း၊
  • (၅) စာရေးဝန်ထမ်းကြီးကြပ်မှုတန်းမြင့်သင်တန်း၊
  • (၆) စာရေးဝန်ထမ်းအခြေခံသင်တန်း။
• ( ဂ ) ပြည်ထောင်စုအစိုးရအဖွဲ့က အခါအားလျော်စွာ ညွှန်ကြားသောသင်တန်းများ။

၃၁။ အဖွဲ့သည် နည်းဥပဒေ ၃၀ ပါ သင်တန်းများတွင် အောက်ပါဘာသာရပ်များကို ပို့ချ ပေးရမည်-

• (က) စီမံခန့်ခွဲမှုဘာသာရပ်၊
• ( ခ ) နိုင်ငံရေးဘာသာရပ်၊
• ( ဂ ) စီးပွားရေးဘာသာရပ်၊
• (ဃ) လူမှုရေးဘာသာရပ်၊
• ( င ) ဥပဒေဘာသာရပ်၊
• ( စ ) စစ်ပညာဘာသာရပ်။

၃၂။ တက္ကသိုလ်ကောလိပ် ဆရာ၊ ဆရာမများ အထူးမွမ်းမံသင်တန်းသို့ သက်ဆိုင်ရာ ပြည်ထောင်စု ဝန်ကြီးဌာနက ရွေးချယ်စေလွှတ်သော နည်းပြ၊ သရုပ်ပြနှင့်အထက် ဆရာ၊ ဆရာမများ တက်ရောက်ရမည်။

၃၃။ အခြေခံပညာဆရာ၊ ဆရာမများ အထူးမွမ်းမံသင်တန်းသို့ ပညာရေးဝန်ကြီးဌာနက ရွေးချယ်စေလွှတ်သော မူလတန်းပြနှင့်အထက် ဆရာ၊ ဆရာမများ တက်ရောက်ရမည်။

၃၄။ အလယ်အလတ်အဆင့် အရာထမ်းစီမံခန့်ခွဲမှုသင်တန်းသို့ သက်ဆိုင်ရာဝန်ထမ်း အဖွဲ့အစည်း များက ရွေးချယ်စေလွှတ်သော အောက်ပါအချက်များနှင့် ပြည့်စုံသည့် လက်ထောက်ညွှန်ကြား ရေးမှူး၊ ဒုတိယညွှန်ကြားရေးမှူးနှင့်အဆင့်တူ အရာထမ်းများ တက်ရောက်ရမည်-

• (က) အသက် ၅၀ နှစ်အောက်ရှိသူ၊
• ( ခ ) အရာထမ်းအခြေခံသင်တန်း သို့မဟုတ် အရာထမ်းလောင်းအခြေခံသင်တန်း (ယခင် အခြေခံဝန်ထမ်းလောင်းသင်တန်း၊ အကြိုဝန်ထမ်းလောင်းသင်တန်း) တစ်ခုခု တက်ရောက်ပြီးသူ၊
• ( ဂ ) တက္ကသိုလ်တစ်ခုခုမှ ဘွဲ့ရရှိပြီးသူ၊
• (ဃ) လက်ထောက်ညွှန်ကြားရေးမှူးအဆင့် အရာထမ်းဖြစ်ပါက ထိုရာထူးတွင် လုပ်သက် အနည်းဆုံးနှစ် နှစ်ရှိသူ၊
• ( င ) ကျန်းမာရေးနှင့်ပြည့်စုံသူ။

၃၅။ အရာထမ်းအခြေခံသင်တန်းသို့ သက်ဆိုင်ရာ ဝန်ထမ်းအဖွဲ့အစည်းများက ရွေးချယ်စေလွှတ် သော အသက် ၄၅ နှစ် အောက်ရှိပြီး ကျန်းမာရေးနှင့်ပြည့်စုံသည့် ပြန်တမ်းဝင်ရာထူးအဆင့် စတင်ခန့်ရာထူးတွင် ခန့်ထားခြင်းခံရပြီးသော အရာထမ်းများ တက်ရောက်ရမည်။

၃၆။ အရာထမ်းလောင်းအခြေခံသင်တန်းသို့ သက်ဆိုင်ရာ ဝန်ထမ်းအဖွဲ့အစည်းများက ရွေးချယ် စေလွှတ်သော အသက် ၄၅ နှစ်အောက်ရှိပြီး ကျန်းမာရေးနှင့်ပြည့်စုံသည့် ပြန်တမ်းဝင်ရာထူးအဆင့် စတင်ခန့်ရာထူးတွင် ခန့်ထားရန် ရွေးချယ်ခြင်းခံထားရသော အရာထမ်းလောင်းများ တက်ရောက် ရမည်။

၃၇။ အရာထမ်းငယ်အခြေခံသင်တန်းသို့ သက်ဆိုင်ရာ ဝန်ထမ်းအဖွဲ့အစည်းများက ရွေးချယ် စေလွှတ်သော အသက် ၄၅ နှစ်အောက်ရှိပြီး ကျန်းမာရေးနှင့် ပြည့်စုံသည့် အောက်ပါဝန်ထမ်းများ တက်ရောက်ရမည်-

• (က) စီမံခန့်ခွဲရေးဝန်ထမ်း(စီးပွားရေး)အဆင့် (၁)၊
• ( ခ ) ပညာရှင်အဆင့် (၂)၊
• ( ဂ ) ကျွမ်းကျင်ဝန်ထမ်းအဆင့် (၆)၊
• (ဃ) စီမံခန့်ခွဲရေးဝန်ထမ်း (အုပ်ချုပ်ရေး၊ လူမှုရေး) အဆင့် (၁)၊
• ( င ) စီမံခန့်ခွဲရေးဝန်ထမ်း (စီးပွားရေး) အဆင့် (၂)၊
• ( စ ) ပညာရှင်အဆင့် (၃)၊
• (ဆ) ကျွမ်းကျင်ဝန်ထမ်းအဆင့် (၈)။

၃၈။ စာရေးဝန်ထမ်းကြီးကြပ်မှုတန်းမြင့် သင်တန်းသို့ သက်ဆိုင်ရာဝန်ထမ်းအဖွဲ့အစည်းများက ရွေးချယ်စေလွှတ်သော အသက် ၄၅ နှစ်အောက်ရှိပြီး ကျန်းမာရေးနှင့်ပြည့်စုံသည့် ဌာနခွဲစာရေးနှင့် ရုံးအုပ်များ တက်ရောက်ရမည်။

၃၉။ စာရေးဝန်ထမ်းအခြေခံသင်တန်းသို့ သက်ဆိုင်ရာဝန်ထမ်းအဖွဲ့အစည်းများက ရွေးချယ် စေလွှတ်သော အသက် ၄၅ နှစ်အောက်ရှိပြီး ကျန်းမာရေးနှင့်ပြည့်စုံသည့် အငယ်တန်းစာရေးနှင့် အကြီးတန်းစာရေးများ တက်ရောက်ရမည်။