နိုင်ငံ့ဝန်ထမ်းနည်းဥပဒေများ (မူလပြဋ္ဌာန်းချက်) နည်းဥပဒေ – ၃၅

ချိန်နှုန်းလစာ (၁၄၀၀၀ဝိ -၂၀၀ဝိ – ၁၅၀၀၀ဝိ) အဆင့်နှင့် အောက်ဝန်ထမ်းများအား အရည်အချင်း စစ်ဆေးအကဲဖြတ်ခြင်း

၃၅။(က) ဝန်ထမ်း၏အရည်အချင်းကိုစစ်ဆေးရာတွင် ရေးဖြေစာမေးပွဲစစ်ဆေးခြင်း၊ လက်တွေ့ လုပ်ငန်းအရည်အချင်းစစ်ဆေးခြင်း၊ ရေးဖြေစာမေးပွဲနှင့်လက်တွေ့လုပ်ငန်း နှစ်ရပ် စလုံးဖြင့်စစ်ဆေးခြင်း၊ လူတွေ့စစ်ဆေး၍ အရည်အချင်းအကဲဖြတ်အမှတ်ပေးခြင်း နည်းလမ်းများကို အသုံးပြုရမည်။

( ခ ) ရာထူးအဆင့်၏ လုပ်ငန်းသဘာဝအလိုက် ရေးဖြေစာမေးပွဲကိုဖြစ်စေ၊ လက်တွေ့ လုပ်ငန်းအရည်အချင်း စစ်ဆေးခြင်းကိုဖြစ်စေ ပြုလုပ်ရန်မလိုအပ်ပါက လူတွေ့ စစ်ဆေး၍ အရည်အချင်းအကဲဖြတ် အမှတ်ပေးခြင်းနည်းကို အသုံးပြုစစ်ဆေး ရမည်။

( ဂ ) အရည်အချင်းစစ်ဆေးရာ၌ အောက်ပါအမှတ်ပေးစနစ်ကို ကျင့်သုံးရမည် –

• (၁) ရေးဖြေစာမေးပွဲနှင့်လက်တွေ့ပါစစ်ဆေးရာတွင် –
  • (ကက) ရေးဖြေစာမေးပွဲအမှတ်ပြည့် ၄၀ မှတ်
    နှင့်
    လက်တွေ့အမှတ်ပြည့် ၆၀ မှတ်
    သို့မဟုတ်
  • ( ခခ ) ရေးဖြေစာမေးပွဲသက်သက် သို့မဟုတ် လက်တွေ့သက်သက်စစ်ဆေးခြင်းအတွက် အမှတ်ပြည့် ၁၀၀ မှတ်
    သို့မဟုတ်
  • ( ဂဂ ) ဌာနဆိုင်ရာအစီအစဉ်ဖြင့် ကျင်းပသည့် ဌာန ဆိုင်ရာ စာမေးပွဲ၊ အခြားနည်းစစ်ဆေးခြင်း အတွက် အမှတ်ပြည့် ၁၀၀ မှတ်
• (၂) အကဲဖြတ်အမှတ်ပေးခြင်းအတွက် အမှတ်ပြည့် ၁၀၀ မှတ်
• (၃) လုပ်သက်အတွက် အမှတ်ပြည့် ၁၀၀ မှတ်
• (၄) လူတွေ့စစ်ဆေးခြင်းအတွက် အမှတ်ပြည့် ၅၀ မှတ်

(ဃ) ဌာနဆိုင်ရာ လူတွေ့စစ်ဆေးရန်မလိုဟု ဆုံးဖြတ်သည့်ကိစ္စများတွင် လူတွေ့စစ်ဆေး ခြင်းမပြုဘဲ ဆောင်ရွက်နိုင်သည်။

( င ) ဝန်ထမ်းများ၏အရည်အချင်းကို စစ်ဆေးရန်အတွက် အကဲဖြတ်မှတ်တမ်းရေး သည့် စနစ်ကို ကျင့်သုံးရမည်။

( စ ) အကဲဖြတ်မှတ်တမ်းရေးရာတွင် ဝန်ထမ်းအား အနီးကပ်တာဝန်ယူ ကြီးကြပ် ကွပ်ကဲသည့်အရာထမ်းက ကနဦးမှတ်တမ်းရေး၍ အထက်အဆင့် အလိုက် တာဝန်ယူ ကြီးကြပ်သည့် အရာထမ်းများက ထပ်ဆင့်မှတ်ချက်ရေးပြီး ဝန်ထမ်း အဖွဲ့အစည်းအကြီးအမှူး သို့မဟုတ် တိုင်းဒေသကြီး သို့မဟုတ် ပြည်နယ်အစိုးရ၏ တာဝန်လွှဲအပ်ခြင်းခံရသူက အပြီးသတ် ထပ်ဆင့်ရေးရမည်။

(ဆ) အကဲဖြတ်အမှတ်ပေးရာ၌ အောက်ပါအရည်အချင်းများအလိုက် စိစစ်အကဲဖြတ်၍ အမှတ်ပေးရမည် –

• (၁) ပေးအပ်သောတာဝန်နှင့်ဝတ္တရာများကိုကျေပွန်အောင် ထမ်းရွက်ခြင်း ၁၀မှတ်
• (၂) လုပ်ငန်းကျွမ်းကျင်မှုရှိခြင်း ၁၀မှတ်
• (၃) ယုံကြည်စိတ်ချရခြင်း ၁၀မှတ်
• (၄) လေ့လာဆည်းပူးခြင်း ၁၀မှတ်
• (၅) ကြိုးစားမှုရှိခြင်း ၁၀မှတ်
• (၆) တီထွင်ကြံဆတတ်ခြင်း ၁၀မှတ်
• (၇) ရုံး၊ အလုပ်ရုံစည်းကမ်းများကိုလိုက်နာခြင်း ၁၀မှတ်
• (၈) အများအကျိုးအတွက်စေတနာ့ဝန်ထမ်းဆောင်ရွက်ခဲ့ခြင်း ၁၀မှတ်
• (၉) ဆက်ဆံရေးပြေပြစ်ခြင်း ၁၀မှတ်
• (၁၀) ခေါင်းဆောင်မှုပေးနိုင်ခြင်း ၁၀မှတ်

( ဇ ) အကဲဖြတ်အမှတ်ပေးရာတွင် –

• (၁) သာမန်အောက်၊ သာမန်၊ သာမန်အထက်၊ ထူးချွန်အဆင့် လေးဆင့်ခွဲခြား ဖော်ပြရမည်။
• (၂) သာမန်အောက်အဆင့်အတွက် ၃ မှတ်အထိ၊ သာမန်အဆင့်အတွက် ၄ မှတ်မှ ၆ မှတ်အထိ၊ သာမန်အထက်အဆင့်အတွက် ၇ မှတ်မှ ၈ မှတ် အထိ၊ ထူးချွန်အဆင့်အတွက် ၉ မှတ်မှ ၁၀ မှတ်အထိ ပေးရမည်။
• (၃) သာမန်အောက်နှင့် ထူးချွန်အဆင့်များအတွက် အကဲဖြတ်မှတ်တမ်းတွင် အကျိုးအကြောင်းကို အကျဉ်းချုပ်ဖော်ပြရမည်။
• (၄) ရာထူးတိုးမြှင့်ပေးမည့် ဝန်ထမ်းအတွက် ကိုယ်ရေးမှတ်တမ်း ဖြည့်စွက်ရန် ပုံစံကို ပုံစံ(၂) ဖြင့် ဖော်ပြထားပါသည်။

( ဈ ) အကဲဖြတ်မှတ်တမ်းရေးသူသည် –

• (၁) သက်ဆိုင်ရာဝန်ထမ်းနှင့်ပတ်သက်၍ လွန်ခဲ့သော ပြက္ခဒိန်နှစ်အတွက် အကဲဖြတ်မှတ်တမ်းကို ဇန်နဝါရီလတွင် ရေးရမည်။
• (၂) သက်ဆိုင်ရာဝန်ထမ်းနှင့်ပတ်သက်၍ နည်းဥပဒေခွဲ (ဆ) တွင် ဖော်ပြထားသည့် အရည်အချင်းတိုင်းကို အကဲဖြတ်လျက် မှတ်တမ်းရေး အမှတ်ပေးရမည်။
• (၃) ပြက္ခဒိန်တစ်နှစ်အတွင်းတွင် သက်ဆိုင်ရာဝန်ထမ်းသည် ထူးချွန်ပြောင်မြောက်စွာ တာဝန်ထမ်းရွက်ခြင်းကြောင့်ဖြစ်စေ၊ အရေးယူအပြစ်ပေးခံရသောကြောင့် ဖြစ်စေ အထူးမှတ်တမ်းရေးရန်လိုအပ်ပါက ကနဦးမှတ်တမ်းရေးသူ အရာထမ်း နှင့်အထက်အဆင့်အလိုက် တာဝန်ယူကြီးကြပ်သည့် အရာထမ်းများ၊ ဝန်ထမ်း အဖွဲ့အစည်းအကြီးအမှူး သို့မဟုတ် ယင်းကတာဝန်လွှဲအပ်သူတို့က ညှိနှိုင်း၍ အကဲဖြတ်မှတ်တမ်းရေးရမည်။
• (၄) ဝန်ထမ်းများအတွက် ရာထူးတိုးမြှင့်ခန့်အပ်ရန် အကြောင်းထူးပေါ်ပေါက်သည့် အခါ သီးခြားအကဲဖြတ်မှတ်တမ်းရေးရမည်။

(ည) အကဲဖြတ်အမှတ်ပေးရာ၌ –

• (၁) နည်းဥပဒေခွဲ(ဆ)တွင် ဖော်ပြထားသည့် အရည်အချင်းအမျိုးအစား ၁၀ ခုအတွက် အမျိုးအစားတစ်ခုလျှင် ၁၀ မှတ် နှုန်းဖြင့် စုစုပေါင်းအမှတ်ပြည့် ၁၀၀ ပေးနိုင်သည်။
• (၂) အကဲဖြတ်မှတ်တမ်းတွင် အကဲဖြတ်မှတ်တမ်းရေးသူများက လက်မှတ် ရေးထိုးရမည်။