ရာထူးအလိုက်အနည်းဆုံးရှိရမည့် ပညာအရည်အချင်း၊ ကျွမ်းကျင်မှုအရည်အချင်းသတ်မှတ်ခြင်းကိစ္စ

၁။ အနည်းဆုံးပညာအရည်အချင်းနှင့် ကျွမ်းကျင်မှုအရည်အချင်းသတ်မှတ်ခြင်း

နိုင်ငံ့ဝန်ထမ်းဥပဒေ၊ ပုဒ်မ ၂၃ တွင် “ဝန်ထမ်းကို ရာထူးတိုးမြှင့်ခန့်ထားရေးအတွက် အနည်းဆုံး လိုအပ်သောပညာအရည်အချင်း၊ ကျွမ်းကျင်မှုအရည်အချင်း၊ ရာထူးသက်နှင့်လုပ်သက်တို့သည် ဝန်ထမ်းအဖွဲ့အစည်းအလိုက် ရာထူးအမျိုးအစားကိုမူတည်၍ ပြည်ထောင်စုအစိုးရအဖွဲ့၏ အတည်ပြု ချက်ဖြင့် သတ်မှတ်ထားသည့်အတိုင်းဖြစ်သည်” ဟုလည်းကောင်း၊ နိုင်ငံ့ဝန်ထမ်းနည်းဥပဒေများ၊ နည်းဥပဒေ ၃၄၊ နည်းဥပဒေခွဲ (ဃ) တွင် “ရာထူး၏ လုပ်ငန်းသဘာဝအလိုက် အနည်းဆုံးလိုအပ်သည့် ပညာအရည်အချင်း၊ ကျွမ်းကျင်မှုအရည်အချင်းတို့ကို သက်ဆိုင်ရာဝန်ထမ်းအဖွဲ့အစည်းသည် ယင်းတို့၏ လိုအပ်ချက်နှင့်အညီ ပြည်ထောင်စုအစိုးရအဖွဲ့၏ အတည်ပြုချက်ရယူသတ်မှတ်ရမည်” ဟု လည်းကောင်း ပြဋ္ဌာန်းထားရှိပါသည်။

ဝန်ကြီးဌာနနှင့်အဖွဲ့အစည်းများအနေဖြင့် ဖွဲ့စည်းပုံပါရာထူးအဆင့်အလိုက် အနည်းဆုံးရှိရမည့် ပညာအရည်အချင်း၊ ကျွမ်းကျင်မှုအရည်အချင်းများကို အတည်ပြုသတ်မှတ်နိုင်ရေး ပြည်ထောင်စု အစိုးရအဖွဲ့ရုံးသို့ တင်ပြသည့်အခါ ပြည်ထောင်စုအစိုးရအဖွဲ့ရုံးမှ အဆိုပါသတ်မှတ်ချက်များသည် နိုင်ငံ့ဝန်ထမ်းဥပဒေ၊ နိုင်ငံ့ဝန်ထမ်းနည်းဥပဒေများနှင့် ညီညွတ်မှု ရှိ-မရှိ စိစစ်ပြန်ကြားပေးပါရန် ပြည်ထောင်စုရာထူးဝန်အဖွဲ့သို့ အကြောင်းကြားလာပါက ပြည်ထောင်စုရာထူးဝန်အဖွဲ့အနေဖြင့် သက်ဆိုင်ရာဝန်ကြီးဌာန၊ အဖွဲ့အစည်းများ၏ ပညာအရည်အချင်း၊ ကျွမ်းကျင်မှုအရည်အချင်း သတ်မှတ်ချက်များကို ပြည်ထောင်စုအစိုးရအဖွဲ့၏ ၂၀-၃-၂၀၂၀ ရက်စွဲပါ အမိန့်ကြော်ငြာစာအမှတ် (၃၉/၂၀၂၀) ပါ ရာထူးအခေါ်အဝေါ်များပြင်ဆင်သတ်မှတ်ခြင်းတွင် ပါဝင်ခြင်း ရှိ-မရှိ၊ နိုင်ငံ့ဝန်ထမ်း နည်းဥပဒေများ၊ နည်းဥပဒေ ၁၄ နှင့် ၁၅ တို့အရ စတင်ခန့်ရာထူးများတွင် အကျုံးဝင်ခြင်းရှိ-မရှိ၊ ကျွမ်းကျင်ဝန်ထမ်းအမျိုးအစားများအတွက် ကျွမ်းကျင်မှုသတ်မှတ်ချက် ပါ မပါ စသည်တို့ကို စိစစ်၍ တွေ့ရှိချက်များကို ပြည်ထောင်စုအစိုးရအဖွဲ့ရုံးသို့ ပြန်ကြားတင်ပြပါသည်။
အရည်အချင်းသတ်မှတ်ချက်များသည် အထက်ပါသတ်မှတ်ချက်များနှင့် ညီညွတ်မှုရှိပါက ဝန်ကြီးဌာနနှင့်အဖွဲ့အစည်းများမှသတ်မှတ်ထားသည့် ပညာအရည်အချင်း၊ ကျွမ်းကျင်မှုအရည်အချင်း များကို ပြည်ထောင်စုအစိုးရအဖွဲ့အစည်းအဝေးသို့ တင်ပြအတည်ပြုချက်ရယူရန် ပြည်ထောင်စုအစိုးရ အဖွဲ့ရုံးမှ သက်ဆိုင်ရာဝန်ကြီးဌာနနှင့်အဖွဲ့အစည်းများသို့ ပြန်ကြား၍ သက်ဆိုင်ရာဝန်ကြီးဌာနနှင့် အဖွဲ့အစည်းများမှ ပြည်ထောင်စုအစိုးရအဖွဲ့အစည်းအဝေးသို့ တင်ပြအတည်ပြုချက်ရယူဆောင်ရွက် လျက်ရှိပါသည်။

ထို့ပြင် ဝန်ကြီးဌာနနှင့်အဖွဲ့အစည်းများက ပြည်ထောင်စုအစိုးရအဖွဲ့မှ အတည်ပြုထားသည့် အနည်းဆုံးရှိရမည့်ပညာအရည်အချင်း၊ ကျွမ်းကျင်မှုအရည်အချင်းသတ်မှတ်ချက်များကို လုပ်ငန်း လိုအပ်ချက်အရ ပြင်ဆင်သတ်မှတ်နိုင်ရေးအတွက် သဘောထားမှတ်ချက်မေးမြန်းလာပါက ပြည်ထောင်စုရာထူးဝန်အဖွဲ့အနေဖြင့် နိုင်ငံ့ဝန်ထမ်းဥပဒေ၊ နိုင်ငံ့ဝန်ထမ်းနည်းဥပဒေများ၊ ပြည်ထောင်စု အစိုးရအဖွဲ့၏ ၂၀-၃-၂၀၂၀ ရက်စွဲပါ အမိန့်ကြော်ငြာစာအမှတ် (၃၉/၂၀၂၀) တို့နှင့်စိစစ်၍ တွေ့ရှိချက်များကိုသက်ဆိုင်ရာဝန်ကြီးဌာနနှင့်အဖွဲ့အစည်းများသို့ပြန်ကြားပေးလျက်ရှိပါသည်။ အနည်းဆုံးရှိရမည့်ပညာအရည်အချင်း၊ ကျွမ်းကျင်မှုအရည်အချင်းသတ်မှတ်ချက်များသည် ညီညွတ်မှု ရှိပါက သက်ဆိုင်ရာဝန်ကြီးဌာနနှင့်အဖွဲ့အစည်းများမှ ပြည်ထောင်စုအစိုးရအဖွဲ့အစည်းအဝေးသို့ တင်ပြ အတည်ပြုချက်ရယူရပါသည်။