ရာထူးတိုးမြှင့်ရေးကိစ္စ

၁။ပညာအရည်အချင်းသတ်မှတ်ချက်ကို လျှော့ပေါ့၍ တစ်ဆင့်မြင့်ရာထူးနေရာသို့ တိုးမြှင့်ခန့်ထား ခွင့်ကိစ္စ

သက်ဆိုင်ရာဌာနအနေဖြင့် သတ်မှတ်ရာထူးသက်ပြည့်မီသည့် ဒုတိယဦးစီးမှူးအား ပညာအရည်အချင်းသတ်မှတ်ချက်ကို လျှော့ပေါ့၍ တစ်ဆင့်မြင့်ရာထူးသို့ တိုးမြှင့် ခန့်ထားနိုင်ရေးအတွက် နိုင်ငံ့ဝန်ထမ်းနည်းဥပဒေများ၊ နည်းဥပဒေ ၃၇၊ နည်းဥပဒေခွဲ (ဂ) ပါ ပြဋ္ဌာန်းချက်အရ အရည်အချင်း စစ်ဆေးရေးအဖွဲ့ကို ဖွဲ့စည်းဆောင်ရွက်၍ ဝန်ကြီးဌာန၊ စီမံခန့်ခွဲရေးကော်မတီ အစည်းအဝေးမှ သဘောတူခွင့်ပြုခဲ့ပြီးဖြစ်ပါသဖြင့် နည်းဥပဒေခွဲ (စ) ပါသတ်မှတ်ချက်များနှင့်အညီ စိစစ်၍ နိုင်ငံတော် စီမံအုပ်ချုပ်ရေးကောင်စီ၊ စီမံခန့်ခွဲရေးကော်မတီ အစည်းအဝေးသို့ တင်ပြခွင့်ပြုချက် ရယူဆောင်ရွက် ရမည်ဖြစ်ပါသည်။ ၎င်းအား ပြန်တမ်းဝင်အရာရှိအဆင့်သို့ တိုးမြှင့်ခန့်ထားလိုခြင်းဖြစ်၍ နိုင်ငံတော် စီမံအုပ်ချုပ်ရေးကောင်စီ၊ စီမံခန့်ခွဲရေးကော်မတီအစည်းအဝေး၏ ခွင့်ပြုချက်ရရှိပါက ပြည်ထောင်စု ရာထူးဝန်အဖွဲ့သို့ ပြန်လည်အဆိုပြုညှိနှိုင်းရမည်ဖြစ်ပါသည်။

၂။ဦးစီးအရာရှိ (ကွန်ပျူတာ) ရာထူးသို့ ကျွမ်းကျင်မှုဆိုင်ရာ ပညာအရည်အချင်းသတ်မှတ်ချက် လျှော့ပေါ့၍ အထူးကိစ္စရပ်အနေဖြင့် တိုးမြှင့်ခန့်ထားခွင့်ကိစ္စ

နိုင်ငံ့ဝန်ထမ်းနည်းဥပဒေများတွင် ထူးချွန်သည့်ဝန်ထမ်းများကို သင့်တင့်သောကာလအတွင်း တစ်ဆင့်မြင့်ရာထူးများတွင်တိုးမြှင့်ခန့်ထားခြင်းဖြင့် ထိုက်ထိုက်တန်တန် ချီးမြှင့်သည့်အနေဖြင့် လည်းကောင်း၊ ရာထူးသက်၊ လုပ်သက် သို့မဟုတ် ပညာအရည်အချင်းသတ်မှတ်ချက်နှင့်ပြည့်မီခြင်း မရှိသော်လည်း ကြိုးစားမှု၊ လေ့လာမှုထူးကဲသာလွန်သည့် ဝန်ထမ်းများကို ချီးမြှောက်နိုင်ရန်အတွက် လည်းကောင်း၊ ရာထူးသက်၊ လုပ်သက် သို့မဟုတ် ပညာအရည်အချင်းသတ်မှတ်ချက်ကို လျှော့ပေါ့၍ ရာထူးတိုးမြှင့်ခန့်ထားခွင့်ပြုခြင်းဆိုင်ရာ သတ်မှတ်ချက်များကိုသာပြဋ္ဌာန်းထားပါသည်။ ဌာနအနေဖြင့် ရာထူးအဆင့်အလိုက် အနည်းဆုံးရှိရမည့်ပညာအရည်အချင်း၊ ကျွမ်းကျင်မှုအရည်အချင်း သတ်မှတ် ချက်များကို နိုင်ငံ့ဝန်ထမ်းဥပဒေ၊ ပုဒ်မ ၂၃ နှင့် နိုင်ငံ့ဝန်ထမ်းနည်းဥပဒေများ၊ နည်းဥပဒေ ၃၄၊ နည်းဥပဒေခွဲ (ဃ) ပါပြဋ္ဌာန်းချက်များနှင့်အညီ ပြည်ထောင်စုအစိုးရအဖွဲ့အစည်းအဝေးသို့ တင်ပြ အတည်ပြုချက် ရယူသတ်မှတ်ထားသည့်အတွက် ကျွမ်းကျင်မှုအရည်အချင်းသတ်မှတ်ချက်ကို လျှော့ပေါ့၍ တစ်ဆင့်မြင့်ရာထူးသို့ တိုးမြှင့်ခန့်ထားလိုပါက ကျွမ်းကျင်မှုအရည်အချင်းသတ်မှတ်ချက်နှင့် ကိုက်ညီမှုမရှိသော်လည်း ရုံးလုပ်ငန်းခွင်တွင် ထိထိရောက်ရောက်အကျိုးရှိရှိ ပြန်လည်အသုံးပြုနိုင် ကြောင်းတို့ကို ရှင်းလင်းဖော်ပြ၍ နိုင်ငံတော်စီမံအုပ်ချုပ်ရေးကောင်စီ၊ စီမံခန့်ခွဲရေးကော်မတီအစည်း အဝေးသို့ တင်ပြခွင့်ပြုချက်ရယူဆောင်ရွက်ရမည်ဖြစ်ပြီး ၎င်းအား ပြန်တမ်းဝင်အရာရှိအဆင့်သို့ တိုးမြှင့်ခန့်ထားလိုခြင်းဖြစ်၍ နိုင်ငံတော်စီမံအုပ်ချုပ်ရေးကောင်စီ၊ စီမံခန့်ခွဲရေးကော်မတီအစည်းအဝေး၏ ခွင့်ပြုချက်ရရှိပါက ပြည်ထောင်စုရာထူးဝန်အဖွဲ့သို့ ပြန်လည်အဆိုပြုညှိနှိုင်းရမည်ဖြစ်ပါသည်။