အထွေထွေကိစ္စ

၁။ ကြိုတင်နှစ်တိုးခံစားခွင့်ပြုနိုင်ရေးကိစ္စ

သက်ဆိုင်ရာဌာနအနေဖြင့် ဗဟိုဝန်ထမ်းတက္ကသိုလ်(အောက်မြန်မာပြည်)တွင် ဖွင့်လှစ်ခဲ့သည့် အလယ်အလတ်အဆင့်အရာထမ်းစီမံခန့်ခွဲမှုသင်တန်း၊ ပြည်သူ့ဝန်ထမ်းစီမံခန့်ခွဲမှုအဆင့်မြင့်ဒီပလိုမာ သင်တန်းအမှတ်စဉ်(၄) ၌ သင်တန်းဆင်းအရည်အချင်း သတ်မှတ်ချက်အဆင့် ၂၊ A+ စာပေထူးချွန်ဆု ရရှိခဲ့ပြီး Management, Economic, Law, Social Science, Political Science, Information & Communication Technology ဘာသာရပ်များတွင် ဂုဏ်ထူးရရှိခဲ့သည့် ဝန်ထမ်းအား ဂုဏ်ပြုချီးမြှင့် သည့်အနေဖြင့် နိုင်ငံ့ဝန်ထမ်းဥပဒေ၊ ပုဒ်မ ၃၄၊ ပုဒ်မခွဲ (ဂ) နှင့် နိုင်ငံ့ဝန်ထမ်းနည်းဥပဒေများ၊ နည်းဥပဒေ ၅၇၊ နည်းဥပဒေခွဲ (ဂ) တို့ပါပြဋ္ဌာန်းချက်များအရ ကြိုတင်နှစ်တိုးခံစားခွင့်ပြုနိုင်မည် ဖြစ်ပါသည်။

[printfriendly current=’yes’]

၂။  ဒေသစရိတ်ခံစားခွင့်ရှိသည့် ဒေသမှ ဒေသစရိတ်ခံစားခွင့်မရှိသည့်ဒေသတွင် (On Duty) ဖြင့် ဆေးပညာမဟာဘွဲ့သင်တန်းတက်ရောက်ခြင်းနှင့်စပ်လျဉ်း၍ ဒေသစရိတ်ခံစားခွင့် ရှိ/ မရှိကိစ္စ

သက်ဆိုင်ရာဌာန၏ အမှာစာနှင့် ပူးတွဲပါရှိသော စာရွက်စာတမ်း အထောက်အထားများအရ ဒေသစရိတ်ခံစားခွင့်ရှိသည့် ဒေသမှ ဒေသစရိတ်ခံစားခွင့်မရှိသည့်ဒေသတွင် တာဝန်ချိန်ကာလ (On Duty) ဖြင့် ဝန်ထမ်းအား မဟာဘွဲ့သင်တန်းသို့တက်ရောက်ရန် ခွင့်ပြုခဲ့ခြင်းသည် ဝန်ထမ်း၏ ပညာအရည်အချင်း တိုးမြှင့်စေရန်အတွက် တာဝန်ချိန်အဖြစ်သတ်မှတ်ပြီး ခွင့်ပြုခဲ့ခြင်းသာဖြစ်ကြောင်း၊ နိုင်ငံ့ဝန်ထမ်းနည်းဥပဒေများ၊ နည်းဥပဒေ ၁၅၀ ပါပြဋ္ဌာန်းချက်အရ ရွေးချယ်စေလွှတ်ခြင်း မဟုတ်ကြောင်း စိစစ်တွေ့ရှိရပါသဖြင့် နိုင်ငံ့ဝန်ထမ်းနည်းဥပဒေများ၊ နည်းဥပဒေ ၁၅၃၊ နည်းဥပဒေခွဲ (ဃ)ပါ တာဝန်ဖြင့် စေလွှတ်ခြင်း စကားရပ်နှင့် အကျုံးဝင်မှု မရှိသည့်အတွက် ဒေသစရိတ်ခံစားခွင့်ပြုရန် မသင့်ပါကြောင်း၊ အဆိုကိစ္စနှင့်စပ်လျဉ်း၍ ဒေသစရိတ်ခံစားခွင့်ဆိုင်ရာ ကိစ္စရပ်များကို အဓိကတာဝန်ယူ စီမံခန့်ခွဲဆောင်ရွက်လျက်ရှိသော စီမံကိန်းနှင့် ဘဏ္ဍာရေးဝန်ကြီးဌာန၏ သဘောထားမှတ်ချက် ကိုလည်း ညှိနှိုင်းရယူသင့်ပါသည်။

[printfriendly current=’yes’]

၃။ မွေးသက္ကရာဇ်ကွဲလွဲနေခြင်းအပေါ် သဘောထားမှတ်ချက်ပြန်ကြားပေးနိုင်ပါရန်ကိစ္စ

သက်ဆိုင်ရာဌာနအနေဖြင့် ဝန်ထမ်းအသက် (၁၈) နှစ် မပြည့်မီ တာဝန်ထမ်းဆောင်ခဲ့သည့် လုပ်သက်များအနက် ပင်စင်အကျိုးခံစားခွင့်ရှိသည့် လုပ်သက်ရေတွက် ခြင်းနှင့်စပ်လျဉ်း၍ ဝန်ထမ်းစည်းမျဉ်းများဆိုင်ရာကောက်နုတ်ချက်စာစောင် အပိုဒ် ၁၆၄ ပါ သတ်မှတ်ချက်နှင့် နိုင်ငံ့ဝန်ထမ်းနည်းဥပဒေများ၊ နည်းဥပဒေ ၂၃၄ ပါပြဋ္ဌာန်းချက်အရ တာဝန် ထမ်းဆောင်ခဲ့သည့် လုပ်သက်များကို ၎င်းအသက် ၁၈ နှစ်ပြည့်ချိန်မှစ၍ ရေတွက်ရမည်ဖြစ်ပြီး ပင်စင်ဆိုင်ရာကိစ္စရပ်များကို အဓိကတာဝန်ယူဆောင်ရွက်နေသည့် စီမံကိန်းနှင့်ဘဏ္ဍာရေးဝန်ကြီးဌာန၊ ပင်စင်ဦးစီးဌာန၏ သဘောထားမှတ်ချက်ကို ညှိနှိုင်းရယူဆောင်ရွက်သင့်ပါသည်။